රවි සහ කුජ මිථුන රාශියේ ගෝචරය ආරම්භ කරයි මිථුන රැස බුධට අයත්ය. රවි ආත්ම කාරක ග්‍රහයායි. එසේම රාජ්‍ය කාරක සහ පිය කාරක ග්‍රහයාද වෙයි. රවි හොදට හිටියොත් රාජ්‍ය අනුග්‍රහය, ගෞරවය රැකියා උසස්වීම් පියාගේ යහපත් බව ආදී ප්‍රථිපල ලබයි. අශුභව හෝ පාප පීඩිතිව සිටියහොත් මීට පටහැනි ප්‍රතිපල ලබයි. කුජ සටන්කාමී ග්‍රහයායි. කුජ නීර්භීත, ආත්ම ධෛර්ය ඇති, පරාජයේදීත් පසු නොබසින ග්‍රහයායි. එසේම ආයුධ පරිහරණය, වේගවත් ක්‍රීඩා, ගණිතය, නව තාක්ෂණය යනාදියට හිමිකම කුජ සතුය. මෙම ග්‍රහයන් දෙදෙනාම උෂ්ණ ග්‍රහයින් වීම නිසාත් හැමවිටම ක්‍රියාශීලීය. කටක රැසේ සිටින ගුරුට සහ සිකුරුටත්, වෘෂභයේ සිටින බුධටත් මෙම ග්‍රහයන් දෙදෙනා මිථුනයේ මැදි වී සිටී. මොවුන් ශුභ භාවයක සිටීමෙන් ජන්මියාට චිත්ත ධෛර්ය වැඩි කරන අතර ඥාණාන්විත මෙහෙවරකට ද පසුබට නොවේ. අශුභ භාවයක නම් අනර්ථ කාරිත්වය වැඩි වේ.
මෙම මූලික කාරණාවන්ද සැළකිල්ලට ගනිමින් ඔබේ ලග්නයට ඇතිවන ශුභ අශුභ තත්ත්වයන් මෙසේය.
මේෂ - රවි + කුජ දෙදෙනා ඔබේ ලග්නයෙන් තුන්වැන්නේ ගමන් කරයි. එය ශුභයි. විශේෂයෙන්ම කුජට භාවය වශයෙන් හොඳම ස්ථානයව තුන්වැන්නයි. මෙනිසා මෙතෙක් පැවති කරදර බොහොමයක් තුනී වේ. සහෝදර සහෝදරියන්ගෙන් උදව් උපකාර ලැබේ. ආත්ම ගෞරවය හා කීර්තිය වෙනුවෙන් කටයුතු කරයි. ඉගෙනීම් කටයුතුවල යෙදී සිටින අයටත්, යන්ත්‍ර සූත්‍ර ඇසුරෙන් කාර්මික කටයුතුවල නියෑලී සිටින අයට යහපත්ය. අනතුරුවලට මුහුණ පෑමට සිදුවිය හැකි බැවින් කල්පනාකාරී විය යුතුය.
වෘෂභ - කථාවට සහ විවාදයට දක්‌ෂයි. නමුත් අන් අයගේ නොසතුටට හේතුවන ලෙස කතා කිරීම ඔබට අවාසි වේ. ඈතක සිට ඔබ හමුවීමට හෝ දුරකථන සංවාද පවත්වන නෑදෑයන් සමග හෝ සහකාර පාර්ශවයේ අය සමග විවාදයෙන් වැළකීම සුදුසුය. ව්‍යාපාර හවුල්කරුවන් සමගද මතභේද ඇතිවිය හැකිය. අන් අය මායිම් නොකර තමන්ගේ වාසිය ගැන සිතයි. ගේදොර ඉඩකඩම් සඳහා මුදල් ආයෝජනය කරයි. අවිවාහක අයට විවාහ මංගල යෝජනා එන කාලයකි. වියදම් ගැන සැලකිලිමත් නොවේ. ඇස්‌වල දුර්වලතා ඇති කරයි. දත් වැටීම්, දිරා යැම් ඇතිකරයි.
මිථුන - රවි + කුජ දෙදෙනාම ලග්නගතව සිටී. උසස් අයගේ ආධාර උපකාර හිමිය. සහෝදරාදීන්ගෙන් උදව් ලැබේ. දරුවන්ගේ දියුණුවට කටයුතු කිරීමට මෙය හොද කාලයකි. ඔබත් දරුවනුත් ශාස්‌ත්‍රීය කටයුතු ප්‍රිය කරයි. අධ්‍යාපන කටයුතුවලින් උසස් තැනක්‌ හිමිකර ගනී. සමාජ ඇසුර හිතකර නොවේ. අන් අය නොතැකීමටත් කිසිවෙකුගේ අදහස් පිළිනොගැනීමත් සටන්කාමී බවත් මීට හේතු වේ. අන් අය සමග ගැටලු දුරදිග ගියහොත් හිසේ තුවාලයක්‌ ඇතිවන සිද්ධියකට භාජනය විය හැකිය. නැතහොත් සුළු අසනීප හැර සෞඛ්‍යය තත්වය යහපත්ය.
කටක - ඔබගේ වැයස්ථානය වු දොළොස්වැන්නේ රවි + කුජ ගමන් කිරීම යහපත් නොවේ. මුදල් අවහිරතා උද්ගත වේ. මුදල් සම්බන්ධ ගනුදෙනු පාඩුවලින් කෙළවර වීමට ඉඩ ඇත. නව ව්‍යාපාරාදිය ආරම්භයට මෙය සුදුසු කාලයක් නොවේ. රැකියාවෙන් පහත වැටීම් හෝ වෙනසකට භාජනය විය හැකියි. ළඟදීම මෙම තත්වය පහව ගොස් ශුභ කාලයක් අත ළගම එන බැවින් ඉඩසීමෙන් සිටිම ශුභ වේ. යන්ත්‍ර සූත්‍ර කටයුතුවල යෙදී සිටින අයට ශුභයි. තමාගේ වැඩ අතපසු කර අන් අයට උදව් කරයි. කලාත්මක දේවල් ප්‍රිය කරයි. ඉගෙනීම් කටයුතුවලට බාධක යෙදේ. පිත් කෝප, ලේ විෂ වීම්, හදිසි අනතුරුවලට ඉඩ ඇති බැවින් ඒ ගැන නිතර කල්පනාවෙන් සිටීම වැදගත්ය.
සිංහ - ලග්නාධිපති රවි සමග කුජ ඔබේ අයස්ථානයේ ගෝචරය ඉතා ශුභයි. සමාජයට හිතවත් සහ උසස් අය ආශ්‍රයට ලැබේ. නව මිතුරු සබඳතා ගොඩනැගේ. ඔවුන්ගෙන් සහ පවුලේ අයගෙන් උදව් උපකාර ලැබේ. මව්පස නෑයන්ගෙන් උදව් ලැබේ. යාන්ත්‍රික හා කාර්මික කටයුතුවල නියැලෙන්නන්ට, නීති අංශයේ අයට ද ඉතා ශුභයි. ව්‍යාපාර කරන සහ නව ව්‍යාපාර ගිවිසුම් මගින් උසස් ආදායම් මාර්ග ඇතිකර ගනී. ශුභ වේලාවක් සහ ශුභ මහා දශා අතුරු දශා ගතකරන අයට ලොතැරයි ජයග්‍රහණ ඇතුළු හදිසි ධන ලාභ හිමිය. එහෙත් නඩු හබවලින් පාඩු සිදු වේ. වෙනදාට වඩා වෙහෙස වීමට සිදුවන මුත් ඉන් තෘප්තියට පත්වේ.
කන්‍යා - ඔබේ දහවැන්නේ මෙම යෝගය යෙදේ. ශුභ අශුභ මිශ්‍රව ලැබෙන කාලයක් නිසා මහත් කැපවීමෙන් සහ උත්සාහයෙන් මෙම කාලය වාසනාවන්ත එකක් කර ගැනීමට දිරි දෙන ග්‍රහ බලයක් ලෙස මෙය හැදින්වීම වඩාත් උචිතය. එනම් දුවන තරමටයි හති යන න්‍යාය මෙහිදී වලංගුය. පියාගේ රැකියාවක හෝ ව්‍යාපාරයක නියුතු අයට විශේෂ ආර්ථික වාසි හිමිය. ව්‍යාපාර හවුල් කරුවන් සමග සහ දුරබැහැර අය සමග සම්බන්ධකම් ඇතිකර ගනී. විදෙස් රැකියා බලාපොරොත්තු වන අයගේ අදහස් මුදුන්පත් වේ. ශාස්‌ත්‍රීය අංශයෙන් මෙන්ම උත්සාහයෙන් දියුණුකර ගත් ව්‍යාපාරවලට උසස් තැනක්‌ හිමි වේ. පරිගණක සහ අන්තර්ජාල , කාර්මික සහ යාන්ත්‍රික කටයුතුවලින් ප්‍රතිඵල ලබයි. අශුභ මහා දශා අන්තර් දශා ගත කරන්නේනම් වැඩකටයුතු අවුල් තත්ත්වයකට පත්කර ගනී.
තුලා - ඔබගේ නවවැන්නේ රවි + කුජ ගමන් කිරීමත් බුධ අටවැන්නේ සිටීමත්, ලග්නාධිපති සිකුරු ගුරු සමග දසවැන්නේ ගෝචරයත් යන සියළු කරුණු අනුව ඔබට ශුභ අශුභ මිශ්‍ර කාලයකි. එහෙත් බුද්ධිමත්ව උත්සාහයෙන් සහ මනා කැපකිරීම් මැද කරන සියලු ක්‍රියාවන් සාර්ථක කර ගත හැකිය. මෙය තව ටිකක් ජ්‍යොතිෂයට අනුව පැහැදිලි කරහොත් රවි, කුජ සහ ගුරු තුලා ලග්න හිමියන්ට අශුභ ග්‍රහයන්ය. බුධ ශුභ ග්‍රහයා වන නමුත් ගෝචරය අටවැන්නේය. එහෙත් ලග්නාධිපති සිකුරු රැකියාස්ථානය හෙවත් දසවැන්න උච්ච ධනකාරක සමගත්, ධනස්ථානාධිපති සහ කලත්‍රස්ථානාධිපති කුජ පෙර පින් පෙන්වන ස්ථානයේ උභයචාරී යෝගයෙන් සශ්‍රීක රවි සමග ගෝචරය ධෛර්යයමත් අයට සුදුසු ග්‍රහ තත්වයකි. එමගින් තාර්කික කටයුතුවල නියැළෙන එනම් නව නිර්මාණකරුවන්ට, පරිගණක ප්‍රෝග්‍රෑම් කරන අයට, නීතිඥ වෘත්තියේ යෙදී සිටින අයට, යම් විෂයයක් තර්කාණුකූළව ඉදිරිපත් කරන, සමාජ අසාධාරණකම් නිර්භයව විවේචනය කරන පොත්, පුවත්පත් කතෘවරුන්ට, විකල්ප මාධ්‍ය සහ සාහිත්‍ය කරුවන්ට ජය උරුමය. පරාර්ථයෙන් කටයුතු කිරීමට පෙළඹෙන නිසා සමාජයේ ප්‍රසිද්ධියට පත් වේ.
වෘශ්චික - රවි + කුජ අටවැන්නේ ගමන් ගැනීම එතරම් යහපත් නැත. සත්‍යය සඳහන් කළහොක් මාරකයි. විශේෂයෙන්ම ශනි ලග්නයේ බැවින් ඒරාෂ්ඨක අපලද යෙදේ. හෘද රෝග, හදිසි අනතුරුවලට ඉඩ ඇත. ශරීර ශක්තිය දුර්වල වේ. පියාට අගුණයි. වගකීමෙන් තොර කටයුතුවල යෙදෙයි. ශරීරයේ උෂ්ණ ගතිය වැඩි වී හෘද රෝග වැළඳේ. යුග දිවිය අවුල් සහගත තත්ත්වයකට පත් වේ. දරු උපත් අපේක්‌ෂා කරන අයට අපලයි. එහෙත් වෘශ්චික ලග්න හිමියනි බිය නොවන්න. මෙම ග්‍රහ තත්වයන් මගින් පෙන්නුම් කරන්නේ ඒකාන්තයෙන්ම සිදුවෙනවාය යන්න නොවේ. ඊට අනුකූළ පාරිසරික සහ වෙනත් තත්වයන් තුලදී එසේ වීමට ඉඩ ඇති බවයි. නැතහොත් යෝජනායි. කිසියම් යෝජනාවකට එරෙහිව වෙනත් යෝජනා ඉදිරිපත් කල හැකිය. නැතහොත් ඒවා ස්ථිර නොකර සිටිය හැකිය. එවිට යෝජනා ක්‍රියාත්මක නොවේ. ජ්‍යොතිශය යනු අනාගතය දැකිය හැකි එකම මිණි පහණයි. මේ තත්වයන් සිදුවිය හැකි බව දැනගත්තේ එහෙයිනි. මින් ප්‍රවේශම්වීම සහ මෙම කාලය ගෙවී යනතරු සිහිනුවණින් යුතුව ඉවසීම හෝ මීට යම් පිළියම් යෙදීම කලහැකිය. මෙම අශුහ තත්වය ඉතාම කෙටිකාලයක් බැවින් පළමු ක්‍රම දෙක සුදුසුය. නැතහොත් උපතින්ම ඒරාෂ්ඨකයක් තිබුණේනම් මෙම තත්වය සමනය වේ. එසේම ශුභ මහා දශා අතුරු දශා ගතකරන අයට සහ ජන්ම කේන්ද්‍රය ශක්තිමත් අයට මෙම අශුභ පල නිශ්ක්‍රීය වේ හෝ අඩුවේ. තම කේන්ද්‍රය බලා ගැනීම කොයිකටත් හොඳය.
ධනු - ඔබේ හත්වැන්නේ රවි+කුජ ගෝචරය සිදු වේ. බැලූ බැල්මට මෙය ඔබට ශුභපලවලට වඩා අසුභ ඵල ලබා දීමට සමත් වේ. ලග්න පලාපල දැක්වෙන මාධ්‍යයක කිසියම් ජ්‍යොතිෂවේදියෙකු එය එසේ පැවසුවේනම් අසත්‍යයක් නොවේ. රවි+කුජ හත්වැන්නේය. කුජ සත්කලත්‍ර යෝගයෙනි. එහෙයින් විවාහ කටයුතුවලට එය එතරම් ශුභ නොවේ. බුධ බාධක ස්ථානයේය. යහපත් තීරණවලට එලැඹීමට අපොහොසත් වේ. ලග්නාධිපති සැපයට කාරක සිකුරු සමග අටවැන්නේය. බාධක මැද කටයුතු කලයුතු බව කියැවෙයි. එනමුත් ධනු ලග්න හිමියනි, මාගේ විග්‍රහය ඊට තරමක් වෙනස් වේ. ඉහත කරුණු ජ්‍යොතිෂාණුකූලව මතුපිටින් පමණක් සත්‍යය වේ. එබැවින් ඉහත ප්‍රථිපල උරුම වුවත්, ධනු ලග්න ඔබට විශේෂ ජයග්‍රහණ සහ ශක්තියක් මෙම ග්‍රහ ගමනේම ගැබ්ව ඇත. එනම් ඔබට ලග්නාධියෝගයේ මහානුභාව ශක්තිය උරුමට. පෙර ලිපියකින් එය විස්තර කර ඇත. ඒ අනුව විද්‍යා තාක්‍ෂණ, පරිගණත, කලා, සාහිත්‍ය ආදී ශිල්ප ශාස්‌ත්‍ර හදාරන අයට ශුභයි. තරඟ විභාගවලින් ජය ගනී. රැකියා නැති අයට රැකියා අවස්‌ථා උදාවේ. පවුල් ජීවිතයේ ගැටලු ඇති කරතත් එය සමනය කර ගැනීමේ තත්වයක් ඇත. උපායශීලීව කටයුතු කරයි. හවුල් ව්‍යාපාර කටයුතුවල නියෑලී සිටින අයට වාසි අත් වේ. අවිවේකී තත්වයක් ඇත. අර්ශස්‌ රෝග, ඌෂ්නාධික රෝග ඇති කරයි. හදිසි අනතුරුවලට ඉඩ ඇති නිසා ඉන් ප්‍රවේශම් වීම මැනවි.
මකර - හයවැන්නේ වූ රෝගස්ථානයේ රවි + කුජ ගමන් ගැනීම නිසා ශරීරය දුර්වල කරයි. සෞඛ්‍යය තත්වය ගැන මේ කෙටි කාලයේදී සැළකිල්ල යොමු කල යුතුය. සතුරු කරදර ඇති විය හැකිය. එහෙත් අන්‍යයන් යටත් කරගෙන සිටීමට හෝ විරුධවාදීන් හා සටන් කිරීමට පෙළඹේ. නමුත් සතුරන් නුවණින් හැසිරවීම වඩාත් පලදායක වේ. ස්වයං රැකියා කරන සහ නීතිය හා කාර්මික කටයුතුවල නියෑලී සිටින අයට ශුභදායකයි. ගෘහ නිර්මාණ කටයුතුවල නිරත අයට සේවක ගැටලු පැන නැගේ. හවුල් ව්‍යාපාරවල නියැලෙන අයෙක් නම් තම මතය ඉදිරිපත් කර අනෙක් අයගේ මතවලට සැළකීමෙන්ද ඔබට මුල්තැන හිමිවේ. තරුණයන්ට ඉදිරි සහකරු හෝ සහකාරිය හමුවීමට ඉඩ ලැබේ. විවිධ බාධක මධ්‍යයේ වුවද ආදර සම්බන්ධතා වර්ධනය වේ. විවාහ අපේක්ෂකයන්ගේ විවාහය ඉක්මන් විය හැකිය.
කුම්භ - කුමන අංශයකින් හෝ දැනුම බුද්ධිය වර්ධනය කර ගනී. ඥාණ ශක්තිය සහ ධාරණ ශක්තිය ඉහළ යයි. උගත් උසස් අය ආශ්‍රයට ලැබේ. ගණිත මිනිත, ඉංජිනේරු කාර්මික කටයුතුවල යෙදී සිටින අයට සහ පරිගණක රැකියාවල නියුතු අයට තම දක්ෂතා පෙන්විය හැකි කාලයකි. රැකියාවේ උසස් වීම් සහ ව්‍යාපාර දියුණුව දැකිය හැකිය. කරදර බාධක අභියෝග ජය ගනී. මේ සියල්ලටම ඔබට හිටිගමන් මතුව එන ඉක්මන් කේන්තිය සහ ඉක්මන් තීරණවලින් වැළකීම අනිවාර්යය වේ. ආලය පිළිබඳ කටයුතු වලදී කරදර මෙන්ම දෝෂාරෝපන ඇති විය හැකිය. උනන්දුව උත්සාහය තිබේ. ශුභාශුභ මිශ්‍ර මෙම ග්‍රහ තත්වය උනන්දුවෙන් උත්සාහයෙන් බුද්ධියෙන් ඔබගේ ශුභ අතට වර්ධනය කර ගැනීමට උත්සාහ ගතහොත් කුම්භ ලග්න හිමියන්ය ජය නියතයි.
මීන - ඔබගේ හතරවැන්නේ රවි + කුජ ගමන් ගැනීම යහපත්ය. ඥානය දියුණුවන කාලයකි. තමාට අවනත වූ පිරිස්‌ බලය ලබයි. අන්‍යයන් අතර කැපී පෙනෙන අතර කීර්තිය ප්‍රශංසාව නොඅඩුව ලබමින් ප්‍රධානත්වය හිමි වේ. නතරව තිබූ නිවාස කටයුතු ඇරඹීමට හොඳ කාලයකි. දේපල ඉඩකඩම් ලැබීමේ භාග්‍ය පවතී. අවශ්‍යනම් නිවසක්‌ ඉදිකර ගැනීමට බැංකු ණයක් ගැනීමටද සුදුසුය. රැකියා සහ ව්‍යාපාර අංශවල දියුණුවක් ගෙන දේ. යාන්ත්‍රික, ගෘහ නිර්මාණ සහ පොළොව සම්බන්ධව කටයුතුවල යෙදී සිටින අයට වාසි අත් වේ. ආදායම් මාර්ග සරු වේ. පවතින රෝගාබාධ සුවවන අතර සෞඛ්‍යය අතින් පීඩාවට පත් නොවේ. එබැවින් කායික සහ මානසික තත්වය යහපත් වේ.
මේ ගැන ඔබේ අදහස හෝ ඔබට යම් ගැටලුවක් නම් අපිට කියන්න. අමතක නොකර කොමෙන්ට් කර්න්න.
0 comments :
Post a Comment