Your personalized daily horoscope

ඔබේ පෞද්ගලික පලාපල ඔබම බලාගන්න

අන්තර්ජාලය මගින් ලොව ප්‍රථම වරට සුවිෂේශී සේවාවක් පලාපල.lk මගින් ඔබට ලබා දෙයි. ඔබගේ ජන්ම තොරතුරු ලබා දී ඊට අදාළ ජ්‍යොතිෂානුකූලව වඩාත් නිවැරදි වූ පෞද්ගලික දවසේ ලග්න පලාපල බලාගන්න දැන් ඔබට පුලුවන්.

පලාපල.lk මගින් ඔබේ ජන්ම තොරතුරු ලබා අනුව ඔබගේ ජන්ම පත්‍රය ස්වයංක්‍රීයව සකසයි. එහිදී ලග්නය, නවාංශකය ඇතුළු වර්ග කේන්දර ද, නැකත සහ ඊට අදාළ සියළුම විස්තරද,  ග්‍රහයන්ගේ ග්‍රහස්තුඨ අංශක කලා විකලා වශයෙන්ද ජ්‍යොතිෂානුකූළව ඉතාමත් නිවැරදිව සොයා ගනී. මේ අතරින් දවසේ පෞද්ගලික ලග්න පලාපල ප්‍රකාශනයට අවශ්‍ය දෑ තෝරාගෙන සත්‍ය වූ සහ ඔබටම අදාළ වූ නිවැරදි දවසේ පලාපල ඉදිරිපත් කිරීමට පලාපල.lk සමත් වෙයි.
‍

තව කියවන්න

වක්‍රව චක්‍රයේ සරනා රාහු සහ කේතු ?

අප සෞරග්‍රහ මන්ඩලයේ සූර්යා වටා පෘථිවිය ඇතුලු සියළු ග්‍රහයන් සූර්යාගේ ගුරුත්වයට සාපේක්ෂව ඉලිප්සා කාර පථයක ගමන් කරන බව අපි දනිමු. පෘථිවිය ගමන් කරන මාර්ගය පෘථිවි කක්ෂය ලෙස නම් කරයි. පෘථිවියේ අක්ෂ ඇලය අංශක විසිතුනහමාරකි.  පෘථිවියේ උප ග්‍රහයෙකු වවන සඳු අංශක පහක අක්ෂ ඇලයකින් යුතුව පෘථිවියේ ගුරුත්වය ඔස්සේ ගමන් කරයි.    

ජ්‍යොතිෂ්ශ්‍රාස්ත්‍රයේදී හිරු, සඳු ද ග්‍රහයන් ලෙස සැළකෙන අතර සියලු ග්‍රහයන් පොළොව කේන්ද්‍ර කොට ගෙන එය වටා ගමන් කරන ලෙස සළකයි. රාහු සහ කේතු යනුවෙන් ග්‍රහයන් දෙදෙනෙකු අපේ ග්‍රහ මඩුල්ලේ නොමැතිමුත් ඕනෑම පුද්ගල කේන්ද්‍රයක මේ දෙදෙනාගේ නම් සටහන්ව ඇත. පියවි ඇසට නොපෙනෙන මෙම රාහු සහ කේතු කවුද? ජ්‍යොතිෂයේදී මොවුන් ග්‍රහයන් වූයේ කෙසේද?     

ජ්‍යොතිෂ්ශ්‍රාස්ත්‍රයේදී රාහු සහ කේතු යනුවෙන් හඳුන්වන මේ දෙදෙනා තාරකා නොවේ. එක්තරා ගණිතමය සංකල්පයන් දෙකකි. ඉහතින් දක්වන ලද අක්ෂ ඇලයෙන් යුතුව පෘථිවිය සූර්යයා වටා තම කක්ෂයේ ගමන් කරයි. චන්ද්‍රයාගේ අක්ෂ ඇලයෙන් යුතුව සිය කක්ෂය වටා චන්ද්‍රයා ගමන් කරයි. මෙම ක්‍රියාවලියේදී පෘථිවි කක්ෂයත් චන්ද්‍ර කක්ෂයත් එකිනෙක ඡේදනය වන ස්ථාන දෙකක් ඇති වන්නේය. එහි උතුරු ලක්ෂය රාහු ලෙසත් දකුණු ලක්ෂය කේතු ලෙසත් ජ්‍යොතිෂයේදී නිර්වචනය කරයි. 

රාහු කේතු කියන මෙම ගමන් මග පෘථිවියේ සිට බැලීමේදී එය චන්ද්‍රයාගේ ගමන් මාර්ගය සූර්යයාගේ ගමන් මාර්ගය ඡේදනය කරන උපකල්පිත ලක්‌ෂ්‍යන් දෙකක් ලෙස වැඩිදුරටත් පෙනේ. මෙම රාහු සහ කේතු අංශක 180 ක රේඛාවක දෙකෙළවර පිහිටයි. මේ අනුව කේන්ද්‍ර සටහන්වල මේ දෙදෙනා සම සප්තකව පිහිටා ඇත. එනම් පුද්ගල කේන්ද්‍රයක එක ග්‍රහයෙකු 1 වෙනි කොටුව තුල නම් අනිත් ග්‍රහයා 7 වෙනි කොටුවේ සිටිනු ඇත. පළවෙනි ග්‍රහයා 6 වෙනි කොටුවේ නම් දෙවැන්නා 12 වෙනි කොටුවේය. රාහු සහ කේතු ග්‍රහයන් එකාකාරී වෙගයෙන් සාමාන්‍ය ග්‍රහයන් භ්‍රමණය වන අතට විරුද්ධ අතට භ්‍රමණය වේ.  රාහු සහ කේතු දිනකට අංශක 03 යි කලා 11 ක් ගමන් කරන අතර වර්ෂයකට අංශක 19 කලා 20 ක දුරක් ගමන් කරයි. එනම් මාස 18 ක කාලයක් මේ දෙදෙනා එක රාශියක ගමන් කරමින් රාශි චක්‍රය සම්පූර්ණ කිරීම සඳහා වසර 18 ක කාලයක් ගනී. (රාශි, අංශක, කලා යනාදිය ඉදිරියේදී ඉගෙන ගනිමු.) 

මෙසේ උපකල්පිත ලක්ෂ දෙකක් ග්‍රහයන් ලෙස ජ්‍යොතිෂයේදී හදුන්වන ලද්දේ ඇයි? පියවි ඇසට පෙනෙන ග්‍රහයන් මෙන්ම මෙම නොපෙනෙන ලක්ෂ්‍ය දෙකේ තිබෙන බලපෑම සුවිශේෂී වීම හේතුවෙනි. මෙම නොපෙනෙන ග්‍රහයන් වූ රාහු කේතු ජ්‍යොතිෂයේදී ඡායා ග්‍රහයන් ලෙස හඳුන්වයි. මේ දෙදෙනා ස්කන්ධයක් මෙන්ම කිරණ විහිදුවීමක්ද නැත. අඳුරේ ගිලී ඇති මෙම දෙපල කිරණ විහිදුවන රවිගේ සහ සඳුගේ පරම හතුරෝ ලෙස ජ්‍යොතිෂයෙදී පිලිගැනේ. 

එසේම යෝග කාරක, බාධක,  22 වැනි දෙර්කාණාධිපති යන ග්‍රහයන්ට රාහු සහ කේතු සම්බන්ධ නොවේ. එනමුත් මොවුන්ගේ බලවත්කමේ අඩුවකුත් නොවේ. ජ්‍යොතිෂයෙදී සැළකෙන ප්‍රබල දෝෂයක් වන කාලසර්ප යෝගයට මූලික වෙන්නේද මෙම රාහු සහ කේතු යන දෙදෙනාය. කාලසර්ප යෝගය ඇති කේන්ද්‍ර හිමියන්ට විවිධ අශුභ පල ජ්‍යොතිෂයේදී හිමි වේ. රාහු සහ කේතු එක් එක් ස්ථානයට සහ එක් එක් ලග්නවලට ඇති කරන පලපෑම් විවිධ වන අතර අපි ඒවා මතුවට සාකච්ඡා කරමු.      

තව කියවන්න

හිරු පොළොව වටා යන ගමන ඇරඹුන දා

අප සෞරග්‍රහ මණ්ඩලයේ ඇති සියලුම ග්‍රහයන් සූර්යයා වටා ගමන් කරන බව ඔබට නොරහසකි. එම ග්‍රහ වස්තූන් විවිධ ප්‍රමාණයෙන් සහ විවිධ ගුණාංගයෙන්ද යුක්තයි. එපමණක් නොව විවිධ වූ කක්ෂීය වේගයකින්ද සමන්විතයි.

මෙසේ වේගවත්ව බ්‍රමනය වන ග්‍රහ වස්තූන්ගේ චලිතයන්ගෙන් විවිධ වූ ශක්තීන් ජනිත වන අතර ඒවා නිරන්තරව විශ්වයට මුදා හරි. එවිට ඒවා පෘථිවිය හෙවත් පොළොවටත් එහි වෙසෙන අපටත් බලපානු ලබයි.
සෞරග්‍රහ මන්ඩලය ගැන මීට පෙර ලිපියෙන් කරුණු දැනගත හැකි අතර හිරු වටා ග්‍රහයන් ගමන් කරන අයුරු මෙහි පළමුවෙනි රූපය මගින් දැක්වේ. (රූප සටහන් විශාලනය කර බැලීමට ඒ මතට ක්ලික් කරන්න.)

නමුත් ජ්‍යොතිෂ්ශ්‍රාස්ත්‍රයේදී හිරු වටා පෘථිවිය ගමන් කරනවා වෙනුවට පොළොව වටා හිරු ඇතුලු ග්‍රහයන් ගමන් කරන අයුරින් සැළකේ. පොළොව මත උපදින සහ ජීවත්වන මිනිසාට ග්‍රහ වස්තූන්ගෙන් නික්මෙන තරංග සහ ශක්තීන්ගෙන් ඇති වෙන බලපෑම් නිශ්චය කර ගැනීම ජ්‍යොතිෂ්ශ්‍රාස්ත්‍රයේ කාර්යභාර්යය වේ.
එම හේතුවෙන් ජ්‍යොතිෂ්ශ්‍රාස්ත්‍රයේදී කේන්ද්‍රය ලෙස ගණන් ගැනෙන්නේ පොළොවයි. එබැවින් පෘථිවිය මධ්‍ය ලක්ෂය කරගෙන ඊට සාපේක්ෂව ග්‍රහ ගමන ජ්‍යොතිෂ්ශ්‍රාස්ත්‍රයේදී නිර්මාණය කරගනු ලබයි. එවිට හිරු ඇතුලු ග්‍රහයන් පොළොව වටා ගමන් කරන අයුරින් දර්ශනය වේ. මෙහි ඉදිරිපත් කර ඇති දෙවැනි රූපයේ ඇති සටහන් දෙක ඊට උදාහරණයකි.

මෙම රූප සටහන්වල පෘථිවිය කේන්ද්‍ර කර ගෙන සරල රේඛා මගින් කොටස් එය කොටස් දොළහකට බෙදා ඇති අතර ඒවා රාශී ලෙස නම් කර ඇත. (ඒ ගැන විස්තර ඉදිරි ලිපියකින් විස්තර කරනු ඇත.) ඊට අමතරව හිරු වටා ග්‍රහයන් අයුරු දැක්වෙන ගමන් මාර්ග වෘත්ත මගින් දැක්වේ. මෙහි හිරුට ආසන්නව ගමන් මාර්ගය බුද ග්‍රහයාගේ කක්ෂයයි. දෙවැන්න සිකුරුගේ වන අතර තුන්වැන්න පෘථිවියේ ගමන් මගයි. මේ අනුව පෘථීවියට ඇතුලතින් සිකුරුගේ සහ බුදගේ ගමන් මාර්ග ඇති බව ඔපට වටහා ගත හැකියි. එසේම පෘථිවියට පිටින් අඟහරු, බ්‍රහස්පති සහ සෙනසුරු ගමන් කරන අයුරු ඔබට පැහැදිලි වෙනවා ඇති. එසේනම් පෘථිවිය කේන්ද්‍ර කර ගෙන හිරු ග්‍රහයන් ගමන් කරන සේ සැළකුවහොත් හැමවිටම හිරුට ආසන්නයේ බුද සහ සිකුරු පිහිටන අතර සෙසු ග්‍රහයන් පෘථිවියෙන් ඕනෑම දිසාවක සිටිය හැකියි.

එපමනක් නොව බුද ග්‍රහයාත් සූර්යයා අතරත් දුර ප්‍රමාණය අංශක 28කි.  එබැවින් බුදට හිරුගෙන් අංශක 28 කට වඩා ඈත්විය නොහැක. එසේම සිකුරු ගමන් කරන්නේ අංශක 48 ක දුරකිනි. එබැවින් සිකුරුටද හිරුගෙන් අංශක 48 කට වඩා ඈත්විය නොහැක. මේ අනුව බුදත් සිකුරුත් අතර තිබිය හැකි උපරිම දුර ප්‍රමාණය අංශක 76 කි. එසේ වන්නේ බුදත් සිකුරුත් හිරුගෙන් දෙපැත්තේ පිහිටන විටදීය.

මේ අනුව පෘථිවිය කේන්ද්‍ර කොට ඇති රාශීන් අතරදී බුද හිරුගේ රාශියේ හෝ ඊට ආසන්න රාශියේ සිටිය හැක. බුදට කිසිවිටෙකත් තුන්වන රාශියට පිවිසිය නොහැක. එසේම සිකුරුට හිරුගෙන් හතරවන රාශියේ සිටිය නොහැක. සිකුරුගේ ගමන් මග අනුව හිරු සිටින රාශියේ හෝ හිරුගෙන් දෙවැන්නේ හෝ තෙවැන්නේ පමණක් සිටිය හැකි බව දැන් ඔබට පැහැදිලි වනවා ඇත.

ජ්‍යොතිෂ්ශ්‍රාස්ත්‍රයට අනුව හිරු සහ පෘථිවිය වටා ගමන් කරන චන්ද්‍රයා ෙහවත් සඳු ද ග්‍රහයෙක් ලෙස සළකනු ලබයි.

එමනිසා ජ්‍යොතිෂ්ශ්‍රාස්ත්‍රයට අනුව සාදන ලද ඕනෑම කේන්ද්‍ර පිටපතක හිරු, බුද සහ සිකුරු යන ග්‍රහයන් ත්‍රිත්වය හැමවිටම එකට සිටින අයුරුත් සඳු, අඟහරු, බ්‍රහස්පති සහ සෙනසුරු කේන්ද්‍ර යේ විවිධ රාශින්වල සිටින අයුරුත් ඔබට දැකගත හැකිය. එසේම සමහර කේන්ද්‍ර සටහන්වල පසුව සොයා ගන්නා ලද යුරේනස් නැප්චූන් සහ ප්ලූටෝද දැකගත හැක. (මේ වන විට ප්ලූටෝ ග්‍රහයන්ගේ ලැයිස්තුවෙන් ඉවත් කර වාමන ග්‍රහයෙකු ලෙස නම්කර ඇත)

මෙම ග්‍රහයන්ට අමතරව අප සෞරග්‍රහ මණ්ඩලයේ දැකගත නොහැකි තවත් ග්‍රහයන් දෙදෙනෙක් කේන්ද්‍ර සටහන්වලදී ඔබට දැකගත හැක. ඒ රාහු සහ කේතු යි. මෙලෙස ජ්‍යොතිෂයේදී පමණක් රාහු සහ කේතු නම් කර ඇති මෙම ග්‍රහයන් කවුරුන්ද?

තව කියවන්න

හිරු සඳු සහ ග්‍රහයෝ

ජ්‍යොතිෂ්ශාස්ත්‍රය හැදෑරීමට හෝ ඒ පිළිබඳව වැඩිදුර විමසීමට පෙර අප වෙසෙන ග්‍රහ ලොව සහ අපේ ලෝකය සමග සම්බන්ධතා පවත්වන සෙසු ග්‍රහයන් සහ උප ග්‍රහයන් පිළිබඳව යම් වැටහීමක් ලබා තිබීම අත්‍යාවශ්‍ය කරුණකි. මන්ද, ජ්‍යොතිෂ්ශාස්ත්‍රය ගොඩ නැගී ඇත්තේ හිරු සඳු සහ ග්‍රහයන් විසින් ලෝකවාසීන්ට ඇතිකරනු ලබන බලයක් නැතහොත් ශක්තියක් හේතු කොට ගෙනය. මෙය විශ්ව ශක්තිය යනුවෙන් හැඳින්විය හැකිය.

අපි වෙසෙන ලෝකය හුදෙකලා එකක් නොවේ. පෘථිවිය ලෙස නම් කර ඇති අප ලොව හිරු සඳු සහ තවත් ග්‍රහ ලෝකයන්ගෙන් සමන්විතය. එය සෞරග්‍රහ මණ්ඩලය ලෙස හැඳින්වේ. මේ ගැන හැදෑරිමට බොහෝ කරුණු ඇති අතර එහි සීමාවන් පිළිබඳව මෙතෙක් නිශ්චිත නිගමනයන්ට නොඑළඹුනු සහ මෙතෙක් සොයා නොගත් කරුණුද බොහෝ වෙති.

ඉන් අපගේ විෂය පථයට රුකුළක් වන වැදගත් කරුණු  අළලා සෞරග්‍රහ මණ්ඩලය පිළිබඳව කෙටියෙන් සළකා බැලීම වටී.

සූර්යයා

අප සෞරග්‍රහ මණ්ඩලයේ ප්‍රධානතම ග්‍රහ තාරකාව සූර්යයා හෙවත් හිරුය. හිරු ගිනි ගනිමින් දිලිසෙන වායු ගෝලයකි. සූර්යයා මත ඇති හයිඩ්‍රජන් පරමානු හීලියම් බවට පත්වීමේ ක්‍රියාවලිය නිසා පැරන්හයිට් අංශක දෙසීය හැත්තෑ ලක්ෂයක (270 00000) තාප ශක්තියක් පිට කරයි. තත්පරයට හතරැස් අඟලකින් පිටවන රශ්මිය අශ්ව බල 20 කට සමකල හැකි බව පැවසේ. එසේම සූර්යයාගෙන් තත්පරයකදී පිටවන සියුම් ද්‍රව්‍ය කොටස් ටොන් හතළිස් ලක්ෂයක් (40 00000 ක්) පමණ බර යැයි නවීන විද්‍යාඥයින් විසින් ගණන් බලා ඇත.
සූර්යයා පෘථිවිය මෙන් 3 30 000 කට වඩා විශාලත්වයෙන් වැඩි අතර, එහි විශ්කම්භය සැතපුම් 8 65 000 ක් පමණ වෙතැයි ගණන් බලා ඇත. සූර්යයාගේ සිට සැතපුම් නවසිය තිස් ලක්ෂයක් (930 00000 ක්) දුරින් පෘථිවිය පිහිටා ඇති අතර, හිරු රැස් පොළොවට පතිත වීමට මින්ත්තු 8 ක කාලයක් ගත වේ.

සෞරග්‍රහ මණ්ඩලයේ ඇති සියලුම ග්‍රහ වස්තුන් සූර්යයා වටා භ්‍රමණය වේ. එනම් සූර්යයාගේ ගුරුත්වයට මෙම සෙසු සියලුම ග්‍රහ වස්තූන් යටත්ය. සූර්යයා තමා වටා වේගයෙන් පරිභ්‍රමණය වෙන ගමන්ම  සිය කක්ෂය වටා යමින් තම වටය සම්පූර්ණ කිරීම සඳහා වර්ෂ 2250 00000 ක් ගත වේ. එනම්, අවුරුදු කෝටි 22 ක් ගත වේ. ඒ අනුව මේ වන විටත් සූර්යයා ඉතා වේගවත්ව පරිභ්‍රමණය වෙමින් සිය ගුරුත්වයට අවනත කරගත් අප පෘථිවිය ඇතුලු සියලුම ග්‍රහයන් සහ උප ග්‍රහයන් ද රැගෙන තත්පරයට හැතැප්ම 170 ක වේගයෙන් ක්ෂීරපථය ඔස්සේ සිය කක්ෂය වටා භ්‍රමණය වෙමින් පවතී.

චන්ද්‍රයා

චන්ද්‍රයා හෙවත් සඳු අපගේ ග්‍රහලොව වන පෘථිවියේ උප ග්‍රහයෙකි. සඳුගේ ගමන් මාර්ගය අපගේ පෘථිවිය වටාය. පෘථිවියේ ගමන් මාර්ගයට අංශක පහක ඇලයකින් චන්ද්‍ර කක්ෂය පිහිටා ඇත. හිරුගේ කිරණ සඳු මතට වැටීමෙන් සඳු දිප්තිමත්ව බබලයි. අනතුරුව හිරුගේ කිරණින් පරාවර්ථනය වන සඳුගේ කිරණ අපගේ පොළොවට පතිත වේ. ඊට තත්පර එකහමාරක කාලයක් ගත වේ.

සඳු ප්‍රමාණයෙන් පෘථිවියෙන් හතරෙන් එකක් පමණ වේ. සඳුගේ විශ්කම්භය සැතපුම් 2163 කි. (කිලෝ මිටර් 3,476). සඳු පෘථිවියෙන් සැතපුම් 240000 ක සාමාන්‍ය දුරකින් පිහිටයි. (කිලෝ මිටර් 384,400). පෘථිවියට සමීපව ගමන් කරනා විට දුර සැතපුම් 221610 ක් වන අතර පෘථිවියෙන් ඈත්ව ගමන් කරනා විට සැතපුම් 252790 කි. සඳුගේ පරිභ්‍රමණ කාලය පොළෝ දින 27.3 කි. කක්ෂ ඇලය අංශක 5.1 කි.

බුධ

ග්‍රහ වස්තූන් අතරින් කුඩාම ග්‍රහයා බුධයි. ප්‍රමාණයෙන් සඳුගෙන් භාගයක් පමණ වේ. බර පොළෝ ස්කන්ධයෙන් 0.06 ක් පමණ වේ. බුධ සූර්යයාට ආසන්නයෙන්ම ගමන් කරන ග්‍රහයා වේ. සූර්යාගේ සිට සැතපුම් 3598700 ක් සාමාන්‍ය දුරකින් පිහිටා ඇත. එනම් කිලෝ මීටර් දශලක්ෂ 57.9 කි. සූර්යයාට ආසන්න වන විට සැතපුම් 285 00000 දුරකින්ද අෑත් වන විට සැතපුම් 430 0000 දුරකින්ද ගමන් කරයි. බුධගේ විශ්කම්භය සැතපුම් 20705 කි. එනම් කිලෝ මීටර් 4878 කි. අක්ෂ ඇලය අංශක 2ක් වන අතර අක්ෂ භ්‍රමණ කාලය පොළෝ කාලයෙන් 58.65 කි. තත්පරයට කිලෝ මීටර් 47.89 ක් කක්ෂීය වේගයක් හිමි බුධ සූර්යයා වටා යාමට දින 87.97ක් ගත වේ.

බුධ චන්ද්‍රයන් නොමැත. පරිභ්‍රමණයක් නොමැති බැවින් රෑ දහවල් වීමක්ද නැත. බුධ කක්ෂය වටා යන විට හැමවිටම එක් පැත්තක් සූර්යයා දෙසට හැරී පවතින බැවින් එම පැත්ත අධික රශ්මියෙන් යුක්ත වන අතර සුර්යයාට පිටුපා ඇති අනෙක් පස අධික ශීතලකින් යුක්තය.

සිකුරු

සූර්යයාගේ සිට සැතපුම් 67245000 මධ්‍යස්ථ දුරකින් පිහිටන සිකුරු ග්‍රහයා සූර්යයාට ළංව ගමන් කරන විට සැතපුම් 66787000 ක් දුරින්ද සැතපුම් 67705000 ක් දුරින් අෑත්ව ගමන් කරයි. සාපේක්ෂව 0.86 ක් වේ. සිකුරුගේ විශ්කම්භය සැතපුම් 7600 කි. කි. එනම් කිලෝ මීටර් 12103 කි. සිකුරුගේ කක්ෂීය වේගය තත්පරයට කිලෝ මීටර් 35.03 ක් වේ. සිකුරුගේ අක්ෂ ඇලයත් බුධගේ මෙන් අංශක 2ක් වන අතර, සිකුරුගේ බර පොළොවට සූර්යයා වටා ගමන් කිරීමට දින 224.70 ක කාලයක් ගනී.

ග්‍රහ ලෝක අතරින් දීප්තිමත් ග්‍රහයා සිකුරුය. බැබලීමෙන් චන්ද්‍රයාට පමණක් දෙවෙනි වන සිකුරු එක් එක් කාලවලදී විශාලව සහ කුඩාවට පොළොවට දර්ශනය වේ. සිකුරු ප්‍රමාණයෙන් පෘථිවියේ ප්‍රමාණයට දළවශයෙන් සමානය.

පෘථිවිය

පෘථිවිය නම් අප වෙසෙන ලෝකය සූර්යයාගේ සිට සැතපුම් නවසිය තිස් ලක්ෂයක් පමණ දුරකින් පිහිටා ඇති අතර පෘථිවයේ සිය චන්ද්‍රයාට සැතපුම් දෙලක්ෂ හතළිස් දහසක් තිබෙන බව කලින් පවසා ඇත. පෘථිවියේ සමක විශ්කම්භය කිලෝ මීටර් 12756 කි. පෘථිවියේ කක්ෂීය වේගය තත්පරයට කිලෝ මීටර් 29.79 ක් වේ. පෘථිවිය අංශක 23.4 ඇල වී ඇති අතර සූර්යයා වටා ගමන් කිරීමට දින 365.26 ක කාලයක් ගනී.

අඟහරු

පෘථිවියට සූර්යයා පැත්තෙන් සිකුරු ඇති අතර අනෙක් පසින් අඟහරු සිටී. පෘථිවියට සමාන ලක්ෂණ ඇති එකම ග්‍රහයා සහ ළඟම ග්‍රහයාද අගහරුය. අඟහරුට රෑ දහවල් වීමද පැය 24 කි. අඟහරුගේ එක එක පැත්ත රතු දුඹුරු නිල් කොළ ආදී පැහැයන් ගනී.

සූර්යයාගේ සිට සැතපුම් 340 00000 ක සිට 630 00000 ක් දුරකින් සූර්යයා වටා ගමන් ගනී. පෘථිවියේ බාගයක ප්‍රමාණයෙන් පෙනෙන අඟහරුගේ සමක විශ්කම්භය කිලෝ මීටර් 6786 කි.අඟහරුගේ කක්ෂීය වේගය තත්පරයට කිලෝ මීටර් 24.13 ක් වේ. පෘථිවිය අංශක 24 ඇල වී ඇති අතර සූර්යයා වටා ගමන් කිරීමට අවුරුදු 1.88 ක කාලයක් ගනී.

බ්‍රහස්පති

සූර්යයාගේ සිට සැතපුම් 4830 00000 ක සාමානය්‍ය දුරකින් (කිලෝ මීටර් දශලක්ෂ 778.3) ඇති බ්‍රහස්පති සූර්යයාට ලංව ගමන් කරන විට සැතපුම් 4600 00000 ක දුරක්ද ඈතින් ගමන් කරන විට සැතපුම් 5060 00000 ක් පමණ වේ. සූර්යයාට පමණක් දෙවෙනි වූ විශාලත්වයකින් යුතු බ්‍රහස්පති ග්‍රහ ලොව සැතපුම් 90000 ක පමණ විශ්කම්භයකින් යුක්තය. එනම් කිලෝ මීටර් 142984 ක් පමණ විශාලය. පෘථිවිය මෙන් 1300 ක් පමණ විශාලත්වයකින් සහ පෘථිවිය මෙන් 318 ක පොළෝ ස්කන්ධයකින් (බරකින්) යුක්තය. එහෙත් අක්ෂ භ්‍රමණ කාලය ඉතා වේගවත්ය. එය පොළෝ පැය 23.93 හා සාපේක්ෂව පැය 9.92 කි.  බ්‍රහස්පතිගේ අක්ෂ ඇලය අංශක 3.1 කි. කක්ෂීය වේගය තත්පරයට කිලෝ මීටර් 13.06 ක් වන අතර සූර්යයා වටා වර්ෂ 11.86 ක් ගත කරයි.

පෘථිවිය මැදින් නැතහොත් බඳින් පිටතට නෙරා ඇති අතර එම නෙරුම සැතපුම් 26 ක් වුවත් බ්‍රහස්පතිගේ බඳෙහි නෙරුම සැතපුම් 5000 කි. ඒ අනුව බ්‍රහස්පති උසට වඩා මහත ස්වරූපයක් ගනී. අප ග්‍රහ ලෝක අතර වැඩිම පොළෝ ගුරුත්වය බ්‍රහස්පතිට හිමි වන අතර එය පෘථිවිය මෙන් දෙකහමාරකි (2.5) .  එබැවින් අවට වූ සහ පෘථිවිය කරා ඇදී එන ග්‍රහක සියල්ලම බ්‍රහස්පතී විසින් තම ගුරුත්වයේ මහිමයේ ඇද ගන්නා බැවින් පෘථිවියේ ආරක්ෂාව තහවුරු වී ඇත. පෘථිවියට ආසන්න වන විට සැතපුම් 365816000 ක සහ ඈත්වන විට සැතපුම් 601540000 දුරින් සිටිමින් අප ලොවට ආරක්ෂාව සැපයීමට තරම් බ්‍රහස්පතිගේ පොළෝ ගුරුත්වය තියුණු  සහ විශේෂිත එකකි.

සෙනසුරු

සෙනසුරු අප සෞර ග්‍රහ මණ්ඩලයේ සිටින කුණු දුහුවිලිවලින් පිරුණු එකම ග්‍රහයාය. වටේට අලංකාරත්වයකින් යුතුව දුහුවිලි වළල්ලක්ද ඇති සෙනසුරු පෙළෝ ස්කන්ධයට සාපේක්ෂව 95.2 ක් වන අතර ප්‍රමාණයෙන්, බරින් හා විශාලත්වයෙන් යුතු බ්‍රහස්පතිට පමණක් දෙවෙනි වේ. එනම් සෙනසුරුගේ සමක විශ්කම්භය සැතපුම් 76500කි. (කිලෝ මීටර් 1427 කි.) සූර්යයාට ඇති මධ්‍යස්ථ දුර කිලෝ මීටර් දශලක්ෂ 120536 කි. එනම් සැතපුම් 886779900 කි. සූර්යයාට ලංව ගමන් කරන විට සැතපුම් 837170000 වන සෙනසුරු සූර්යයාගෙන් ඈත්ව ගමන් කරන විට සැතපුම් 936388000 කි. සෙනසුරුගේ අක්ෂ භ්‍රමණ කාලය පොළෝ කාලයෙන් 10.67 කි. එනම් පෘථිවි පැය 10 යි විනාඩි 14 යි තත්පර 24 කින් සෙනසුරු තමා වටා කරකැවෙයි. ඒ අංශක 26.7 අක්ෂ ඇලයකින් යුතුවය. කක්ෂීය වේගය තත්පරයට කිලෝ මීටර් 9.64 ක වේගයකින් ගමනේ යෙදෙන සෙනසුරු සූර්යයා වටා යෑමට වසර 29.46 ක් ගත කරයි. සෙනසුරු සූර්යයාගෙන් බොහෝ ඈතින් ගමන් කරන බැවින් සීතලෙන් වෙලී සිටින දුහුවිලිවලින් පිරි තෙතමනය අඩු ග්‍රහයෙකි.

 සටහන…..
ජ්‍යොතිෂ්ශාස්ත්‍රය යන අප විෂය පථය හැදෑරිමට තරම් වූ ප්‍රමාණවත් තොරතුරු  සහිතව අපි අපේ සෞරග්‍රහ මණ්ඩලය ගැන විමසා බැලුවෙමු. මෙමගින් ඔබට තහවුරු වූ කරුණු අතර මේවාද වේ.

හිරු සඳු ඇතුලු සියලුම ග්‍රහ වස්තූන් එක්තරා ක්‍රමයකට නැතහොත් රිද්මයකට අනුව විවිධ වූ කක්ෂයන් ඔස්සේ චලනය වේ. මෙම ග්‍රහ වස්තූන් මත සූර්යයාට කෝණගත වන අයුරින් සූර්යයාගේ කිරණ පතිතවන අතර ඒවා පෙරළා පරාවර්ථනය වේ. මෙවන් පරාවර්තිත කිරන අප පෘථිවියේ ඇති සෑම සජීවී සහ අජීවී වස්තුන් මත පතිත වී කිසියම් බලපෑමක් ඇති කරනු ලබයි.

එසේම විවිධ ප්‍රමාණයේ සහ ගුණයෙන් යුතු වූ ග්‍රහ වස්තු විවිධ වේගයකින් කරකැවෙමින් ගමන් කරනා විට ඉන් මුදාහරින ශක්තිය සුළුපටු නොවන බවත්, මේ සෞරග්‍රහ මණ්ඩලයේ ඉතා සුළු ප්‍රමාණයක් හිමිව ඇති අපේ ලොව වෙසෙන ජීවීන්ට සහ වස්තූන්ටත් ඒවායෙහි බලපෑම්වලට හසු නොවී සිටීමට නොහැකි බවත්ය.
මතු පිටින් නොපෙනුනත් ආකර්ශනය, විකර්ශනය, තරංග ක්‍රියාකාරීත්වය, වේගවත්ව චලනය වන වස්තූන් විසින් උපදවන ලද ශක්තිය ආදී මෙතෙක් විද්‍යාවෙන් සොයාගත් දේට වඩා වැඩි යමක් සොයා නොගත් දේවල් අතර තිබිය හැකිය යන්නයි.

එබැවින් නොදන්නා දෙයක් පිළිබඳව කිසියම් සොයා බැලීමකට හෝ අධ්‍යයනයට නොගොස් නොදන්නාකමින් හෝ ද්වේශයෙන් යුතුව හෙළාදකිනවාට වඩා කළයුතු දේ කුමක්දැයි සිතා බැලීම ඔබට භාරයි.

තව කියවන්න

ජ්‍යොතිෂ විද්‍යාව සත්‍යක්ද? මිථ්‍යාවක්ද?

අප ජන සමාජයේ බොහෝ දෙනෙකුට එදා සිට අදටත් ජ්‍යොතිෂය පිළිගත හැකි සත්‍යක්ද? නැතහොත් හුදු මිථ්‍යාවක්ද? යන්න ගැටලුවක් විය. හෙට දිනයේත් මෙය විසඳාගත නොහැකි බොහෝ දෙනෙක් මෙම පැනයම යළි යළිත් නගනු ඇත.

ජ්‍යොතිෂය කොහේ කොතැනක කවුරු විසින් කවදා පටන් ගත්තාදැයි නිශ්චිතව පැවසීමට කිසිවෙක් නොදනී. එනමුත් මිනිස් ශිෂ්ඨාචාරයේ ආරම්භයත් සමගම ලොවට දායාද වූ මෙම විෂය පථය ලොව සියළු ආගම් සහ දර්ශනයන්ට වඩා ඉපැරණි බව නම් අතිශයෝක්තියක් නොවේ.

වනචාරී යුගය පසුකරන ලද මිනිසා ක්‍රමයෙන් කෘෂිකර්මාන්ත දිවිය පෙරදැරි කරගත් ශිස්ඨාචාරයට අනුගත විය. එහිදී තම බව භෝග නිෂ්පාදනයට වර්ෂාව සහ සෙසු කාලගුණික තත්වයන් හමුවේ සූර්යයාගෙන් සහ චන්ද්‍රයාගෙන් වන බලපෑම් මොනවාද යන්න අත්දැකීම් තුලින් තේරුම් බේරුම් කර ගැනීමට සමත් විය. ඉන්පසුව සිකුරු සහ අඟහරුගෙන් වන බලපෑම්ද, සුළං වැසි වියලි ආදී කාලද, සෘතු විපර්යාසයන්ද සාමාන්‍ය මිනිස්සු ද අවභෝධ කර ගත්හ.

ඉර හඳ ඇතුළු ග්‍රහ තාරකා පිළිබඳව වැඩි දුරටත් හදාරමින් විවිධ පරීක්ෂණ ඔස්සේ යම් නිගමනයන්ට එළැඹීමේ මෙම ක්‍රියාවලිය ජ්‍යොතිෂ්ශ්‍රාස්ත්‍රයේ ආරම්භය විය. ජ්‍යොතිෂ්ශ්‍රාස්ත්‍රයේ ඉතිහාසය ගැන කරුණු සොයා බැලීමේදී අනාවරණය වන කරුණු අතර ලෝකයේ පෙරදිග රටවලින් ආරම්භ වූ මෙම විෂය පසු කාලීනව ලොව බටහිර රටවලද ප්‍රචලිත වෙමින් විවිධ පර්යේෂණ හා සංස්කරණ මගින් තව දුරටත් දියුණුවට පත් වී ඇති බවත්, මෙලොව උපත ලබන ඕනෑම කෙනෙකුගේ ජන්ම පත්‍රය තුළින් ජන්මියාගේ ගතිගුණ ජීවන තත්වය සහ අනාගතය පිළිබඳ යම් අනාවැකි පැවසීමේ ඇති එකම ක්‍රමය ජ්‍යොතිෂ්ශ්‍රාස්ත්‍රය බව තවදුරටත් සනාථ වීමයි.

ජ්‍යොතිෂ්ශ්‍රාස්ත්‍රය පිළිඳව යම් දැනීමක් නොමැතිව ඊට ගරහනු අටියෙන් විරුද්ධ වූ අයට විද්වතුන් පවසා ඇති හොඳම පිළිතුර නම් ජ්‍යොතිෂ්ශ්‍රාස්ත්‍රය ඉගෙන ගෙන ඉන් අනතුරුව ඊට විරුද්ධව ඔවුන්ගේ මතය ප්‍රකාශ කළ යුතු බවයි. ජ්‍යොතිෂ්ශ්‍රාස්ත්‍රයට බොරු කිරීමට මෙම ශ්‍රාස්ත්‍රය ඉගෙන ගත් බොහෝ උගත්තු අවසානයේ තමන් පෙර දැරූ මතය පිළිබඳ කනගාටු වූ අතර ඉන් පසුව ජ්‍යොතිෂ්ශ්‍රාස්ත්‍රයට විශාල මෙහෙවරක්ද කලා වූ අය වූහ.
නවීන තාරකා විද්‍යාවේ ආරම්භය ලෙස සැළකෙන 15 වන සියවසේදී නිකුලස් කොපර්නිකස් විසින් හිරු වටා පෘථිවිය ඇතුළු සෙසු ග්‍රහ ලෝක ගමන් කරන බව සොයා ගත් අතර, අයිසෙක් නිව්ටන් (1642-1727) විසින් ගුරුත්වාකර්ශන සොයා ගැනීමත්, ක්‍රි.ව. 1960 දී ගැලීලියෝ ගැලිලි විසින් දුර දක්නය සොයා ගැනීමත් නවීන තාරකා විද්‍යාවේ ප්‍රභළ සංදධිස්ථානය විය. මෙම සොයා ගැනීම්වලින් අනතුරුව පෘථිවිය ඇතුළු ග්‍රහ ලෝක විශ්වයේ හැසිරෙන්නේ කෙසේද සහ ඒවායින් මිනිසුන්ට වන බලපෑම් මොනවාද යන්නත් විද්‍යාවෙන් පිළිතුරු සෙවීමට බටහිර උගත්තු උත්සුක වූහ.

එහෙත් මීට සියවස් ගණනාවකට පෙර ජ්‍යොතිෂ්ශ්‍රාස්ත්‍රය පිළිබඳ උනන්දු වූවන් විශ්වය යම්තාක් දුරට ජයගත් අතර, මෙලොව වාසය කරන්නන්ට ග්‍රහ තාරකාවන් බලපාන අයුරු ගැන යම් නිගමනයන්ටද එළැඹීමට සමත් විය. සූර්ය, කාශ්‍යප, පරාසර සහ යවන ආදී සෘෂිවරු මනස මුල් කරගත් අධ්‍යයාත්මික දැනුමෙන් ග්‍රහ තාරකාවන් හා මිනිසා අතර සම්බන්ධය සොයා ගත්හ. ලෝකෝත්තර මග පෙන්වා දුන් ශ්‍රී ගෞතම සම්මා සම්බුදු රජානන් වහන්සේද විශ්වය ගවේෂණය කලේ මෙම අද්විතීය අධ්‍යාත්මික ඟදානයෙනි.

ඉන්දියාවේ සහ අප රටේද උගතුන් විසින් පුරාණයේ සිටම ජ්‍යොතිෂ්ශ්‍රාස්ත්‍රය භාවිත කර තිබෙන බවට ඉතිහාසය සාක්ෂි දරයි. විජයාගමනයට පෙර සිටම එනම්, රාවණා රජතුමාගේ පියා වන පුලස්ථි නම් සෘෂිවරයා ගැන ඉතිහාසයේ ඇති කරුනු අනුව ලංකාවේ ජ්‍යොතිෂ්ශ්‍රාස්ත්‍රය ඉතාමත් දියුණු වි තිබූ බවනම් ඉතාමත් පැහැදිලිය. එපමණක් නොව පණ්ඩුකාභය රජතුමා අනුරාධපුර නගර නිර්මාණයේදීත්, කාවන්තිස්ස, පණ්ඩුකාභය, දුටුගැමුණු, යන රජවරු වෙහෙර විහාර ඉදි කිරීමේදීත් නැකැත් අනුව කටයුතු කර ඇති බවට මහාවංශය පැහැදිලිව සාක්ෂි දෙයි.

පරදේශීන්ගේ ආක්‍රමණයත් සමගම ජ්‍යොතිෂ්ශ්‍රාස්ත්‍රය යන මෙම මහඟු විෂය පමණක් නොව දේශීය වෙදකම, බලගතු යන්ත්‍ර මන්ත්‍ර, බුද්ධාගම, හෙළ සිරිත් විරිත් ඇතුළු මෙකී නොකී ලාංකීය අනන්‍යතාව ඇති අපගේ සංස්කෘතික වටිනාකම් හිතා මතාම අභාවයට යවන්නට කටයුතු කළේය. ඒ වෙනුවට ආත්මවාදී සංකල්ප ඔස්සේ පවත්වා ගෙන ගිය ඔවුන්ගේ ආගමත්, සමාජ රටාවත් සහ සිරිත් විරිත් මෙරට ප්‍රචලිත කරන්නට විය. අපගේ සියළු දෑ ඔවුන් විසින් නූගතුන්ගේ ක්‍රියාවන්යැයි ගරහන්නට විය.

ඔවුන් සමග ගණුදෙනු කරන ලද අප රටේ එවකට සිටි ඉංග්‍රීසි උගත් සමහර රදළයන් සහ ඉහළ මධ්‍යම පංතිකයන් විසින් එතෙක් පැවති අප සමාජ රටාව හා සංස්කෘතිඅය මායිම් නොකර සහ පාවා දී, පරදේශිකයන්ගේ මුදලට, ලබාදුන් තාන්න මාන්නවලට සහ ආකල්පවලට ගරු සරු දැක්වීය. ඔවුන් විසින් ජ්‍යොතිෂ්ශ්‍රාස්ත්‍රය නූගත් දුප්පතුන්ගේ විෂයක් බවට නිගරු කලේය.

එබැවින් ඉන්පසු උපදින ලද අප රට වැසියන්ට ජ්‍යොතිෂ්ශ්‍රාස්ත්‍රය ඇතුලු පුරානයේ තිබූ බොහෝ ශ්‍රාස්ත්‍රයන් ගැන නිවැරදි වැටහීමක් නොවූයෙන් මේවායේ සත්‍ය අසත්‍යතාවය සහ වටිනාකම තේරුම් ගැනීමට අපොහොසත් විය. එහෙත් ශ්‍රාස්ත්‍රයට ලැදි දුප්පතුන් අතරත්, උගත් සංඝයා වහන්සේලා නිසාත් මෙම මහඟු ශ්‍රාස්ත්‍රය ආරක්ෂා ආරක්ෂා විය.

ජ්‍යොතිෂය යනු කිසිම පදනමක් නැති, තම ආත්මශක්තිය පිළිබඳව විස්වාසයක් නැති අයගේ තේරුමක් නැති පුහු විශ්වාශයකි. සැතපුම් ලක්ෂ ගණන්, කෝටි ගණන් දුර සිටින ග්‍රහයන්ට අපේ චිත්ත ශක්තියට හෝ ජීවිතවලට කළ හැකි දේ කුමක්ද?, නූගතුන්ගේ විෂයයක් වන මේ වැඩකට නැති ජ්‍යොතිෂය දැන ගැනීමෙන් සහ විස්වාස කිරීමෙන් ඇති තේරුම මොකක්ද යන්නෙන් සිතන පිරිස එදා මෙන්ම අදත් සිටී.

ඒ අය දෙස් විදෙස්හි ජ්‍යොතිෂ්ශ්‍රාස්ත්‍රයට මහගු සේවාවක් කල ලංකාවේ තොටගමුවේ ශ්‍රී රාහුල හිමියන්, වීදාගම මෛත්‍රිය හිමියන් ඇතුළු උගතුන් ද ඉන්දියාවේ කේ. එස්. ක්‍රිෂ්ණමූර්ති පඬිතුමා, මහාචාර්ය සූර්ය නාරායන් රාවෝ යන උතුමන් නූගතුන්දැයි සිතා බැලීම වටි.

තව කියවන්න

ජ්‍යොතිෂ්ශ්‍රාස්ත්‍රයේ ඉතිහාසය

අත්දැකීම් සමග පරිණත වූ යමක් වටහා ගතහැකි වූ මිනිස්සු ස්වකීය පරිසරයේ සිදුවන විවිධ වෙනස්කම්වලට ඉරහඳ පමණක් නොව සෙසු ග්‍රහ තාරකාවනුත් බලපාන බව වටහා ගත්හ. ඒ පිළිබදව වඩාත් සංවේදී වූ ඔවුහු ජන ජීවිතයේ විවිධ වෙනස්කම් සහ අනාගතයේ සිදුවිය හැකි දේවල් අනුමාන කරමින් යම් අනාවැකි කීමට පටන් ගත්හ.

තව කියවන්න

ඉර හඳ තේරුම්ගත් පුරාණ මිනිස්සු

ජ්‍යොතිෂය කොහේ කොතැනක කවුරු විසින් කවදා පටන් ගත්තාදැයි නිශ්චිතව පැවසීමට කිසිවෙක් නොදනී. එනමුත් මිනිස් ශිෂ්ඨාචාරයේ ආරම්භයත් සමගම ලොවට දායාද වූ මෙම විෂය පථය ලොව සියළු ආගම් සහ දර්ශනයන්ට වඩා ඉපැරණි බව නම් අතිශයෝක්තියක් නොවේ.

වනචාරී යුගය පසුකරන ලද මිනිසා ක්‍රමයෙන් කෘෂිකර්මාන්ත දිවිය පෙරදැරි කරගත් ශිස්ඨාචාරයට අනුගත විය. එහිදී තම බව භෝග නිෂ්පාදනයට වර්ෂාව සහ සෙසු කාලගුණික තත්වයන් හමුවේ සූර්යයාගෙන් සහ චන්ද්‍රයාගෙන් වන බලපෑම් මොනවාද යන්න අත්දැකීම් තුලින් තේරුම් බේරුම් කර ගැනීමට සමත් විය. ඉන්පසුව සිකුරු සහ අඟහරුගෙන් වන බලපෑම්ද, සුළං වැසි වියලි ආදී කාලද, සෘතු විපර්යාසයන්ද සාමාන්‍ය මිනිස්සු ද අවභෝධ කර ගත්හ.

ඉන් අනතුරුව විඩාවට හුදෙකලාවට ජන කවි ගායන කළ පුරාණ මිනිස්තු ඉර හඳ තාරකාවන් මිනිසුන්ට බද්ධ වන බව දැන ඒවා ඇතුළත්ව සිය බස්වහර ගොඩ නගන්නට විය. ඒවායෙහි ඇති වැදගත්කම නිසාම ග්‍රහ වස්තූන්ට පුද පූජා පවත්වන්නටත් සහ වන්දනාමාන කරන්නට පෙළඹීය. තම ජීවන චෛර්යාවන් ඊට අනුව ගෙවෙන බව තේරුම් ගත්තේය.

දිනපතා පහන්වෙත්ම නැගෙන හිරුගේ ප්‍රභාෂ්වරයෙන් ගහ කොළ සතා සීපාවන් මෙන්ම මිනිසාද නව ජීවයක් ලද්දා සේ තම අරමුණු හා අවශ්‍යතාවයන් සපුරා ගැනීම පිණිස දිවාකල ගත වෙහෙස කරවීය. එසේම ගහ කොළ දළුලෑමට මල් ඵල හට ගැනීමට මෙන්ම මිනිසා ඇතුලු සියළු සත්වයන්ගේ පැවැත්මට හිරුගේ ශක්තිය කෙතරම් අගනේද සහ අවශ්‍ය වේද යන්න කල් යල් යත්ම මිනිස්සු හොඳින් වටහා ගත්හ.

හිරු අවරට යත්ම සියොතුන් රෑන් පිටින් තම කැදලි කරා පියාඹන තෙක්ම වෙහෙස මහන්සි වූ මිනිස්සු තම දවසේ නටයුතු හමාර කරමින් සිය කුටුම්භ තුල ලැගුම් ගත්හ.

ඈත ක්ෂිතිජයෙන් චන්ද්‍රයා සිනාසෙන කුමරියක් විලසින් නැගී එනවාත් සමගම මිනිසාගේ ගතට නැගුනු විඩාව ක්‍රමයෙන් යටපත්ව හදවත් අවදි වී සිතුවිලි ක්‍රියාත්මක වෙන්නට විය. අඹුදරුවන් සමග අල්ලාප සල්ලාපයේ යෙදෙමින් එකිනෙකාගේ ආදරය සෙනෙහස සහයෝගීත්ව වර්ධනයේලා කටයුතුවල නිරත වීය. එසේම තරුණ හදවත් අවදි වි ගී සීපද ගැයීම ආදී කලාකාමී සිතුවිලි මෙන්ම  විවාහකයන් අතර සරාගී සිතුවිලි වර්ධනය වීම සහ තම වර්ගයා බෝ කිරීමට චන්ද්‍රයා හෙවත් සඳු මිනිසුන්ගේ හදවත්වලට කොතරම් බලපෑමක් කරනවාද යන්න මිනිස්සු වටහා ගත්හ.

සඳුගෙන් වඩදිය බාදිය ඇතිවන බව, සද කාලයේ පූදින ගොයම බොල්වන බව, මෝරන ගස්වල එලය වැඩි බව, සෙම් රෝග අපස්මාරය හෝ උමතුව වැඩි වෙන බව යනාදී වසයෙනි.

එසේම සෘතු වෙනස්වීම, මෝසම් සුළං, වර්ෂා කාලය, නියගය ආදී සෙසු කාලගුනික විපර්යාසද මිනිසා විසින් මනාව අධ්‍යයන කරන ලදී. හිරු සදුට අමතරව වෙනත් ග්‍රහයන්ගේ බලපෑම් එනම් ඉරබටු තරුව හෝ පහන් තරුව ලෙස හඳුන්වන සිකුරුගෙන් කුරහන් මෙනේරි වැනි විවිධ බෝගවලට වන බලපෑම් ආදියද, ඊට  චන්ද්‍රයාගේ සංයෝගයෙන් කඩුපුලු මල් පිපීමද, රතු පාටින් දිස්වෙන තරුව හෙවත් අඟහරු හෙවත් කුජ ග්‍රහයා දුටුවිට දද කුෂ්ඨ වැනි හමේ රෝග වැඩිවන හැටි අයුරු යනාදිය පිළිබඳවද සාමාන්‍ය මිනිස්සු ද අව‍භෝධ කර ගත් බව පැරණි මිනුසුන්ගේ අදහස විය.

ග්‍රහ වස්තූන් මගින් මානව වර්ගයාට සහ අප ජීවත්වන පරිසරයට වන බලපෑම් මොනවාද යන්න බුද්ධිය වර්ධනය වූ අය විසින් වැඩිදුර සිතන්නට උත්සුක විය. භාවනාව යෝගී ක්‍රම ආශ්‍රෙයන්ද ග්‍රහ වස්තූන් සහ තාරතා පද්ධති ගැන විමර්ෂනය කරන්නට සහ වටහා ගැන්මට පුරුදු පුහුණු විය. නවීන විද්‍යාෙවෙන් පොහොසත් වර්ථමාන යුගයට වඩා ඈත අතීතයේ තම අධ්‍යාත්මික ශක්තිය දියුණු කරගත් මිනිසුන් විසූ බවත් ඔවුන් ඒවායින් විවිධ ආකාරයෙන් වැඩගත් බවටත් විස්වාශයක් පවතී. පාරම්පරික ජනයා අතර තිබූ බොහෝ මෙවන් දෑ නූතන සාමාන්‍ය ජනයාහට පතපොතෙහි සොයා ගැනීමට නොහැකි බැවින් ඒවායෙහි වැඩිදුර විස්තර නුවමනාය.

තව කියවන්න